VISITA Á R.A.G.

Os nosos futuros académicos

Onte, Martes 24 de abril, visitamos a Real Academia da Lingua Galega con alumnado de 1º de Bach. Comezamos polo salón de plenos. A fundación da Academia, a súa situación actual, os seus compoñentes, a escasa presenza de mulleres na institución, as súas actividades, obxectivos, logros... foron algúns dos temas máis importantes que se trataron alí. A seguir subimos ao primeiro andar e visitamos o museo dedicado a Emilia Pardo Bazán, e soubemos máis sobre os seus escritos, as súas ideas... e tamén estivemos no salón da casa museo, curioseamos os mobles, cadros, revistas da época e especialmente o gabinete da escritora cos seus obxectos persoais... Pero sobre todo salientamos o comportamento de todos, que resultou exquisito! Foi unha mañá moi intensa que nunca esquenceremos

 "Na miña opinión si que é necesario ir polo menos unha vez á R.A.G. A visita foi interesante e o informador, Manuel, intentaba que xurdise o noso interese pola institución, pola lectura... El tivo unha actitude coa que intentaba achegarse a nós, os alumnos. A información que deu pareceume moi adecuada, o único, ó final no museo de Emilia Pardo Bazán fomos un pouco ás presas" (Nildes Abella)

      "Eu penso que todo o mundo debe ir polo menos unha vez á R.A.G, xa que me pareceu moi interesante e quedei coas ganas de ver a biblioteca da que nos falou Manuel, o noso guía. Fixo moi bo traballo e gustoume que intentase achegarse ós alumnos e  penso que o conseguiu. O único que non me gustou moito foi que se extendeu bastante no museo de Pardo Bazán."  (Lúa Roldán)

       "Pareceume unha visita bastante amena, aínda que eu pensei que o guía, Manuel nos ensinaría a biblioteca da R.A.G., xa que mostrou bastante interese en que volvésemos para coñecela. A visita, aínda que foi longa, pois parouse nalgúns aspectos bastante tempo, foi contándonos todo de maneira entretida, xa que é xoven e expresábase de xeito coloquial. Por último creo que todos deberiamos ir algunha vez á Academia e aproveitarnos dos recursos dos que dispoñemos, xa que para algo están aí" (Cristina Frade)

        "Na miña opinión foi unha visita bastante interesante e con gran valor, aínda que nalgúns momentos pola súa duración fíxoseme algo pesada. Penso que polo menos hai que ir unha vez xa que aprendes máis sobre a historia da nosa lingua e como se formou. Por último penso que os xóvenes temos que poñer o noso gran de area para que o número de falantes en galego aumente e non se perda" (David Lamas)

        "Esta saída cultural á Real Academia Galega pareceume a mellor que fixemos en moito tempo. A información que recibimos foi moi interesante, xa que demostramos a importancia do galego ao longo da historia e as dificultades polas que tivo que pasar ata hoxe en día. O instructor, Manuel, tamén nos motivou a facer uso dos recursos que temos ao noso redor e de usar o galego xa que é unha lingua moi importante usada por moitos intelectuais e académicos. En conclusión, penso que Manuel ten toda a razón e penso visitalo algún día no primeiro piso ou na biblioteca da Academia"  (Daniel Trujillo)