REBECA PONTE

Por Patricia Lado:

Unha deseñadora galega personaliza zapatos do xeito máis orixinal.

Rebeca Ponte é unha artista galega adicada profesionalmente ás artes plásticas e á música. Compaxina o seu traballo coa customización artesá de zapatos, ademais de ter unha longa experiencia plástica noutras disciplinas.

A súa afección comezou xa dende cativa. “Eu crieime entre telas e patróns, a miña nai tiña unha escola de corte e confección. As alumnas de miña nai dábanme os botóns que lles sobraban, anacos de puntilla, os vivos, anacos de tea… Eu pintábaos e despois roubáballe os zapatos de tacón á miña irmá maior e convertíallos en zapatos de princesa, coma dicía eu, coa axuda do meu amigo o super-gen”.

Deseña zapatos exclusivos e personalizados para eventos especiais e, sobre todo, para noivas.

“Busco este tipo de apliques que me recordan aos adornos ou aos botóns dos abrigos antigos dos anos 30, ou anos 20. Lazos, plumas, terciopelo, piñas, conchas... Os zapatos poden levar perlas naturais, algún recordo familiar...”

Recolle os zapatos da noiva e personalízaos, de xeito que os converte nunha pequena peza de arte exclusiva.